Dhowr iyo toban qof oo lagu dilay weerrar ka dhacay Senegal

Saddex iyo toban qof ayaa lagu dilay weerrar ka dhacay magaalada loo nasiino tego ee gobolka Casamance ee waddanka Senegal.
Howlwadeennada isbitaalka la geeyay maydadka ayaa sheegay in dadka dhintay qaarkood la toogtay halka kuwo kalana qoorta laga jaray.
Dadka dhintay ayaa la sheegayaa inay yihiin dhalinyaro.
Ilaa iyo haatan ma ay cadda cidda ka dambaysay weerrarka.
Gobolka Casamance ayaa waxaa ka taagnaa colaad daba dheeraatay oo u dhaxaysay dowladda iyo fallaagada MFDC, taas oo doonaysa inay madaxbannaani gobolkaasi gaarsiiso, kumannaan qof ayaana colaaddaasi ku dhintay.
Milateriga Senegal ayaa sheegay in weerrarka ay suuragal tahay inuu xiriir la leeyahay markii dhawaantan fallaagada MFDC laga sii daayay laba qof oo ay haysteen.
Gobolka Casamance oo mar ahaa mid ku wanaagsan dalxiiska ayaa waxaa caasimadda Senegal ee Dakar ka gooyay waddanka Gambia.
Gobolkan waxa uu hoy u yahay dhowr qowmiyadood, oo ay ku jiraan masiixiyiin badan, halka dhinaca waqooyina ay u badan yihiin saddex qowmiyadood oo bulshooyinkoodu ay Muslimiin yihiin.
Qulqulatooyinka gobolkaasi ka dhacayay ayaa yaraaday tan iyo 2014 markaas oo xabbad joojin ay isku afgarteen dowladda iyo fallaagada.

Related posts

Leave a Comment